መተው — የመኖር ጥበብ (መግቢያ)

 መተው — የመኖር ጥበብ

“መተው ነገሬን ከተተወ…”

አንዳንድ ጊዜ ችግራችን የገጠመን ነገር ብቻ አይደለም፤ ያጋጠመንን ነገር መተው አለመቻላችን ነው።

ሰዎች በማይጠቅም ክርክር ዉስጥ ይገባሉ። ከማይረባ ጉዳይ ጋር ለሰዓታት ይከራከራሉ። አንድ ሰው የተናገረውን ቃል ለቀናት በአእምሯቸው ይዘው ይኖራሉ። የተፈጠረ ግጭት ከተፈታ በኋላም በልባቸው ውስጥ ይቀጥላሉ። አንዳንዶች ደግሞ ያለፈውን ስህተት ደጋግመው ይኖራሉ።

“እንዲህ ባላደርግ ኖሮ…”

“እንዲህ ባይለኝ ኖሮ…”

“እሱ ያደረገብኝን አልረሳውም…” ብለው ያለፈውን ዛሬ ውስጥ ይኖሩታል።

እውነቱ ግን ይህ ነው፦

·       ሁሉንም ነገር መሸነፍ የለብህም።

·       ሁሉንም ክርክር ማሸነፍም አያስፈልግህም።

·       አንዳንድ ነገሮችን መተው አለብህ።

·       መተው ማለት መሸነፍ አይደለም

ብዙ ሰዎች “ከነገሩ ራቅሁ” ማለት እንደ መሸነፍ ያዩታል።

ነገር ግን ጥበበኛ ሰው የሚጠይቀው፦

“ይህንን ጉዳይ ማሸነፍ ከቻልኩ ምን አገኛለሁ?” ብቻ አይደለም።

“ይህንን ጉዳይ ለማሸነፍ ምን እከፍላለሁ?” የሚለውንም ይጠይቃል።

·       ጊዜህን?

·       ሰላምህን?

·       ግንኙነትህን?

·       ትኩረትህን?

·       አእምሯዊ ጉልበትህን?

አንዳንድ ጊዜ አንድ ክርክርን በማሸነፍ ሰላምህን ታጣለህ።

እናም የክርክሩ ውጤት ከከፈልከው ዋጋ ያነሰ ከሆነ፣ መተው ሽንፈት ሳይሆን ጥበብ ነው።

ሁሉም ነገር የአንተ ጉዳይ አይደለም

ይህንን ለመማር ብዙ ዓመታት ያስፈልጋሉ።

ሰው የሚያየው ሁሉ የእሱ ጉዳይ ይመስለዋል።

የሰው ንግግር፣ የሰው አመለካከት፣ የሰው ባህሪ፣ የሰው ውሳኔ… ነገር ግን የጎለበተ ሰው አንድ ነገር ይማራል፦

“ይህ የእኔ ጉዳይ ነው? ወይስ የሌላ ሰው ጉዳይ ነው?”

·       የሌላ ሰውን አስተሳሰብ መቆጣጠር አትችልም።

·       የሌላ ሰውን አፍ መቆጣጠር አትችልም።

·       የሌላ ሰውን ምርጫ ሁልጊዜ መቀየር አትችልም።

·       ግን የራስህን ምላሽ መምረጥ ትችላለህ።

ይህ ነው የመተው ጥበብ።

መተው ማለት መርሳት አይደለም

አንድ ሰው ሲጎዳህ መተው ማለት ያደረገብህን መርሳት አይደለም።

አንዳንድ ነገሮች አይረሱም።

አንዳንድ ቃላት አይረሱም።

አንዳንድ ክስተቶች በሕይወታችን ውስጥ ምልክት ይተዋሉ።

ግን ማስታወስ እና በዚያ ሕመም ውስጥ መኖር የተለያዩ ነገሮች ናቸው።

መተው ማለት ያለፈውን ማጥፋት ሳይሆን፣ ያለፈው ዛሬህን እንዳይመራ መፍቀድ ነው።

በሥራ ቦታም መተው ያስፈልጋል፤ በድርጅት ውስጥም ይህ እውነት ነው። መሪ ሁሉንም ችግር ራሱ ለመፍታት ከሞከረ፣ በመጨረሻ ድርጅቱንም ራሱንም ያደክማል።

ስለዚህ ጥሩ መሪ ማወቅ ያለበት፦

• የትኛውን ጉዳይ መያዝ እንዳለበት
• የትኛውን መፍታት እንዳለበት
• የትኛውን ለሌሎች መስጠት እንዳለበት
• የትኛውን መተው እንዳለበት ነው።

Delegation የሥራ መስጠት ብቻ አይደለም፤ አንዳንድ ነገርን “እኔ ራሴ ማድረግ አለብኝ” ከሚለው አስተሳሰብ መላቀቅም ነው።

ለማኅበረሰብም ይህ ትምህርት አለው

ማኅበረሰብ ያለፈውን ሁሉ እየጎተተ ወደፊት መሄድ አይችልም።

ያለፈውን ማስታወስ ያስፈልጋል።

ከስህተት መማር ያስፈልጋል።

ታሪክን መረዳት ያስፈልጋል።

ግን ያለፈውን ቁስል የዛሬ ሕይወት መሠረት ማድረግ ወደፊት መሄድን ያዘገያል።

ታሪክ ለመማር ነው፤ በታሪክ ውስጥ ለመታሰር አይደለም። እውነተኛው የሕይወት ጥንካሬ

ሕይወት ሁልጊዜ ምቹ ስለሆነች ጥሩ ሕይወት አንኖርም።

ሁሉም ነገር እንደፈለግነው ስለሆነ ደስተኞች አንሆንም።

ጥሩ ሕይወት ማለት ችግር የሌለበት ሕይወት ሳይሆን፣ በችግር መካከል ራስን መጠበቅ የቻለ ሕይወት ነው።

·       ሁሉንም ነገር መቀየር አንችልም።

·       ሁሉንም ሰው ማስደሰት አንችልም።

·       ሁሉንም ክርክር ማሸነፍ አንችልም።

·       ሁሉንም ችግር መፍታት አንችልም።

ግን አንድ ነገር ሁልጊዜ እንችላለን፦

·       የትኛውን ነገር ልይዝ?

·       የትኛውን ልንፈታ?

·       የትኛውን ልንተው?

ይህንን ማወቅ የሕይወት ትልቅ ጥበብ ነው።

ራስህን ዛሬ ጠይቅ ምን ነገር ነው አሁንም ይዤ የምኖረው፣ ግን መተው ያለብኝ?

·       አንድ ክርክር ሊሆን ይችላል።

·       አንድ ቂም ሊሆን ይችላል።

·       አንድ ያለፈ ስህተት ሊሆን ይችላል።

·       አንድ ግንኙነት ሊሆን ይችላል።

·       አንድ የራስህ አስተሳሰብ ሊሆን ይችላል።

·       ወይም ለረጅም ጊዜ የተሸከምከው የሌላ ሰው ቃል ሊሆን ይችላል።

ከዚያ ራስህን ጠይቅ፦

“ይህን ነገር ብተወው ምን አገኛለሁ?”

·       ምናልባት ሰላም።

·       ምናልባት ጊዜ።

·       ምናልባት ትኩረት።

·       ምናልባት አዲስ ግንኙነት።

·       ምናልባት አዲስ ሕይወት።

አንዳንድ ጊዜ ወደፊት ለመሄድ አዲስ ነገር መጨመር አያስፈልግም፤ አሮጌውን ነገር መተው ብቻ በቂ ነው።

መተው እንደ ጥበብ

·       የሚጠቅምህን ያዝ።

·       የሚያስተምርህን ተማር።

·       የሚጎዳህን ፈውስ።

·       የማይጠቅምህን ተው።

·       እና ወደፊት ሂድ።

ምክንያቱም፣ “ነገርን መተው ነገርን መሸነፍ አይደለም፤ ለራስህ ሕይወት ቦታ መፍጠር ነው።”