የህይወት ታላቁ ፈተና “ጠላትህን ዉደድ” (ክፍል ሦስት)

ባለፉት ሁለት ተከታታይ ክፍሎች “ ጠላትን ” ስለመዉደድ ጥቂት ነገር ብለናል በዛሬዉ ፅሁፋችን ደግሞ እንደ እግዚአብሔር ፈቃድ የመጨረሻዉን ክፍል እንመለከታለን፤ እግዚአብሔር “ጠላቶቻችን” እንድንወድ ያስችለን፡፡

ጠላቴን ለመዉደድ የሚያስችለኝ ነገር ምን ላድርግ? (ምን መደረግ አለበት?)

ጠላትህን ለመዉደድ እነዚህን ነገሮች ሳታወላዉል አድርግ!

ምናልባት እነዚህን የተዘረዘሩትን ነገሮች በሙሉ በአንዴ ለማድረግ ይከብዱ ይሆናል፤ ይከብዳሉም፡፡ ነገር ግን የሚከብደዉን ሁሉ እንተወዋለን ፣ እንሸሸዋለን ማለት አይደለም፡፡ ማንኛዉም የዓለማችን ነገሮች የመለማመድ ዉጤት ናቸዉና ዘወትር በድርጊታችን ዉስጥ እንለማመዳቸዉ፡፡ በእርግጠኝነት ለዉጥ እናመጣባቸዋለን … ለዚያዉም በጣም የሚያስደንቅ … ነገር ግን ብዙ መንገድ ያስጉዙናል፡፡ቢሆንም ግን ጥቂቶች ለእኔ እስከ አሁን ጠቅመዉኛል በእርግጠኝነት አንተንም ይጠቅማሉና ሞክራቸዉ፤ ከታች በዝርዝር የተቀመጡትን ፈፅማቸዉ፡፡

        i.        ጠላቴ ስለምትለዉ ሰዉ ከዚህ ቀደም የሚሰማህን ነገር ማሰብ አቁም፡­ በፊት ስለሚሰማህ ስሜት ደጋግመህ አስብ ( አስር ጊዜ )፤ አሁን ደግሞ የሚሰማህን አስብ እዉነት ያንን ነገር ማቆምህን ራስህን ገምግመዉ እርግጥ ነዉ በአንዴ ሃሳብህን መቆጣጠር ሊከብድህ ይችላል ነገር ግን ደጋግመህ አድርገዉ ( እርሳዉ )

       ii.        ራስህን በእርሱ ቦታ አድርገህ አስብ፡­ ያኔ በዉስጥህ የሚመጣዉን ጥላቻ ታስወግደዋለህ፤ እርሱ ያደረገዉን ድርጊት አንተም እርሱ ቦታ ብትሆን ታደርገዋለህና፡፡በቃ አሁን ያ ሰዉ ማለት አንተ ነህ፡፡ ያ ሰዉ እንደ አንተ ትክክለኛ ሰዉ የነበረ ነዉ ያ አጋጣሚ በርሱ ላይ ይህን ክፉ ድርጊት አመጣበት እንጂ፤ ስለዚህ ይህን ሰዉ ከመጥላት ያንን ክፉ ድርጊት ጥላ፡፡ በዚህ አጋጣሚ የለጠልህ ጥሩ ሰዉ ሁን፡፡ የሰዉ ልጅ በጠቅላላ ጥሩ ነገር ለማድረግ ይጥራል ነገር ግን ስህተት ይሰራል፡፡ ስህተት እና ጥፋት ይለያያል፡፡ እንኳን ለተሳሳተ ላጠፋም ይቅርታ ማድረግ ግድ ይለናል፡፡ አለበለዚያ በድርጊቶች ላይ የተለያየ አመለካከት አለዉ፡፡ አንድን ነገር ከተለያየ ቦታ ላይ መመልከት እጅግ ይከብዳል ግን እጅግ ይጠቅማል “ 6 ” ይህን ቁጥር አንተ ስትፅፈዉ ስድስት ስትለዉ ከፊት ለፊትህ ለተቀመጠዉ ደግሞ “ 9 ” ሆኖ ስለሚታየዉ ዘጠኝ ሊለዉ ይችላል፡፡ ችግሩ ከቁጥሩ  ወይንም ከሰዉየዉ ሳይሆን ሰዉየዉ ከተቀመጠበት ቦታ ነዉ፤ ስለዚህ አንድን ነገር ከመወሰናችን በፊት ራሳችንን ከሰዉየዉ ቦታ አድርገን ብንመለከተዉ መልካም ነዉ፡፡

      iii.        ልትረዳዉ ሞክር፡­ በርሱ ቦታ ራስህን የማስቀመጥ ዋና ዓላማዉ ይህ ነዉ፤ እርሱ ያደረገዉን ነገር ለምን እንዳደረገዉ ከተረዳኸዉ ቀጣዩ ድርጊትህ መረዳት ይሆናል፡፡ እዉነት እልሃለዉ ጠላቴ የምትለዉን ሰዉ ከምንም በፊት ችግሩን ልትረዳዉ ሞክር እዉነቱን ታገኛለህ፤ ምናልባት ይህ ሃሳብ ላይዋጥልህ ይችላል ነገር ግን አድርገዉ፡፡

የህይወት ታላቁ ፈተና “ጠላትህን ዉደድ” (ክፍል ሁለት)

ባለፈዉ በመግቢያችን ላይ ጠላትን ስለመዉደድ አንስተን  በቀጣዩ ክፍል በሰፊዉ ቀሪዎቹን እንደምንዳስስ ተቀጣጥረን ነበር በቀጠሮአችን መሰረት እነሆ በክፍል ሁለት ተገናኘን፤

ü ጠላትህን ዉደድ ምን ማለት ነዉ?

ደስ የሚልና ጥሩ ጥያቄ ነዉ፤ ነገር ግን እንደየሰወች አስተሳሰብ እና አተረጓጎም ይለያያል፡፡ ትንሽ ገለፃ ለማድረግ ያህል “ ጠላት ”  የሚለዉን አስቀድመን ማየት ይጠበቅብናል፡፡ጠላት ማለት ለዚህ ምንባብ  አንባቢ ልብ እንዲለዉ የሚፈለገዉ የአገር ጠላት ማለት እንዳልሆነ ላሳስብ ወዳለሁ፡፡ስለአሸባሪዎች ማዉራት እንዳልፈለኩ አንባቢ ልብ ይለዋል፡፡ በመሰረታዊነት በፅሑፍ ለማንሳት የተፈለገዉ ስለሰዉ ልጅ ሲሆን በማንኛዉም መንገድ አንወዳቸዉም ብለን ስለፈረጅናቸዉ ሰወች ነዉ፤እንደዚህ ዓይነት ሰወች በሁላችንም ሕይወት ዉስጥ አሉና፡፡ የኛንም ሰላም የሚነሱን ከእግዚአብሔር ጋርም የሚያጋጩን ፤… 

ü ጠላቶቻችን እነማን ናቸዉ?

1)     ምናልባት ገና ስማቸዉ ሲጠራ የሚያበሳጨን ፣ ወይንም ስማችንን ሲጠሩን ሊያመን የሚደርስ፣ በዚያም ሆነ በዚህ የነርሱ ነገር የሚያሳምመን ዓይነት ሰወች ፣ መጠኑ ይለያይ እንጂ በነርሱ ነገር ላይ ቅሬታ ያለን ዓይነት ሰወች፤ ( እነዚህ ሰወች ፍቅረኛችን የነበሩ ሊሆኑም ይችላሉ አንድ ያልተጠበቀ አጋጣሚ ጠላት ያሰኛቸዉ ጠላት ያደረጋቸዉ)

2)    ምናልባትም የቤተሰብ አባል የሆኑና በመካከላችን ትልቅ ቅራኔ ያለን፣ ወይንም በአንድ ወቅት በማይረባ ጉዳይ ተጋጭተን የነበርን፤

3)    ምናልባትም በምናዉቃቸዉ ወይም በምንወዳቸዉ ሰወች ላይ ከህሊናችን አልጠፋ ያለ በደል ያደረሱ ሰወች ሊሆኑ ይችላሉ፡፡( ከአካል ጉዳት እስከ ያላቸዉን ግንኙነት ሊጎዳ የሚችል ድረስ )

4)    ምናልባትም መምህራኖቻችን (የፈተና ዉጤት አበላሽተዉብን፣ የማይሆን ነገር ጠይቀዉን ፣ ዉጤት ስጡን ብለናቸዉ እምቢ ብለዉን )፣ የሥራ ባልደረቦቻችን ፣ የፍቅር ወይንም የትዳር አጋሮቻችን፣ አለቆቻችን ወይንም አሰሪዎቻችን፣የአገር መሪዎች፤

ታዲያ እነዚህን ሰወች “ ጠላትህን ዉደድ ” ማለት ምን ማለት ነዉ?

ዉደድ ሲል በግልፅ ማስቀመጥ የምፈልገዉ ነገር የተለያዩ ፆታዎች የፍቅር ስሜት ያለበት ለማለት እንዳልተፈለገ በግልፅ ማስቀመጥ ነዉ፡፡ ከዚሁ ጋር ማያያዝ የምፈልገዉ ሌላኛዉ ነገር ልጆቻችንን፣ ወንድሞቻችንን፣ የቤተሰብ አባላቶቻችንን፣ የልብ ጓደኞቻችንን፣ … የምንወደዉ መዉደድ እንደሚለያየዉ ሁሉ ይህም ከዚያ ይለያል፡፡ (መቸስ የትዳር አጋራችንን እና የልብ ጓደኛችንን የምንወደዉ ምን ያህል እንደሚለያይ አንባቢ ይለየዋልና ) ስለዚህ በጎ ያደረጉልንን ሰወች ፍቅር⁄መዉደድ ፣ የምናዉቃቸዉን ወይም በፍፁም የማናዉቃቸዉ ሰወች መልካም ነገር ሲያደርጉ ስናያቸዉ የምንወዳቸዉ ፣ አለበለዚያ ለትናንሽ ህፃናት የምናሳየዉ ፍቅር፣ ይህንን መዉደድ⁄ ፍቅር ነዉ እንግዲህ ለነዚህም ከላይ ለዘረዘርናቸዉ በደል ፈፃሚያን የምንሰጣቸዉ ፡፡

v  ወሲባዊ ⁄ የፍቅር ስሜት የሌለዉ መዉደድ ለሌላ ሰዉ ከቤተሰባችን አባል ⁄የቅርብ ጓደኞቻችን ለምንላቸዉ ⁄ ዉጭ እናደርጋለን?

v  ይህንን መፈፀም ያለምንም ጥርጥር ዋጋ አያሳጣንም ፣ ምንም አያጎድልብንም፤ እንዲሁ ለሌላዉም ቢሆን

v  በእርግጠኝነት ይህንን የሚተገብሩ ከሆነ ስለሰዉ ልጅ ያለዎት አስተሳሰብ መልካም ይሆናል ( ምክንያቱ ምንም ይሁን ምን )

v  ከዚህ የላቀዉ ደግሞ ይህንን ማድረግ ላቃታቸዉ ማገዝ የበለጠ የሚደነቅ እና በሁላችንም ዉስጥ ከሰረፀ በዓለም ላይ የሰፈነዉ እልቂት ⁄ መጠፋፋት በእርግጠኝነት ይቀየራል፡፡ መሪዎች ተፎካካሪዎቻቸዉን እስር ቤት አያጉሩም ፣ ሊያጠፉ አይሯሯጡም ፣ተቃዋሚዎች ለአመፅ አይነሱም ሰይፍ አይመዙም፣ በየምክንያቱ አይጠላለፉም ይልቅስ ተነጋግረዉ ለአገር እና ለህዝብ የሚበጀዉን ይሰራሉ እንጂ፡፡

ነገር ግን ጠላትን መዉደድ ወዳጅን የመዉደድ ያህል ቀላል ነገር ባይሆንም ያንን ስሜት ግን ማምጣት ይቻላል፤ ፀብን ፣ ጥላቻን የለመደ አብሮ አደግ ማንነታችን እንዲሁ በቀላሉ ባይቀየርም ጥረት ግን ይቀይረዋል፡፡ ስለዚህ ጠላታችንን ለመዉደድ ምን ማድረግ አለብን ⁄ ይጠበቅብናል?

የህይወት ታላቁ ፈተና “ጠላትህን ዉደድ”

ክርስቲያን ሆንን አልሆንን፣ወደድንም ጠላንም፣በየትኛዉም የእምነት አስተምህሮ ዉስጥ ብንሆንም በጌታችን በመድሃኒታችን በኢየሱስ ክርስቶስ ትምህርተ ወንጌል ዉስጥ ለማንኛዉም የሰዉ ልጅ ጥሩ የመሆን ፍላጎት ሊሆን ከወደደ የሚገደደዉ ወይም ሊቀበለዉ ግድ የሚለዉ መሰረታዊ ነገር አለ፤ (ፀሐፊዉ ሊዮ ባኩታ በገፀ ድሩ እንዳሰፈረዉ)

ü  በአቅራቢያችን የሚገኙ ጎረቤቶችን መዉደድ አይደለም፣

ü  የሚወዱንን ስለሚወዱን አፀፋ ለመመለስ መዉደድ አይደለም፤ ነገር ግን

v   ጠላቶቻችንን፣ የሚጠሉንን፣ በህይወት መኖራችንን የማይፈልጉትን፣ የእኛን ማግኘት ፣የእኛን ጤና መሆን፣ ወጥቶ መግባት ፣ ሰርቶ ማግኘት ፣ ነግዶ ማትረፍ፣ ዘርቶ መቃም፣ ወልዶ መሳም፣… በጭራሽ የማይፈልጉትን መዉደድ፡፡

ይህ አባባል ፣ ይህ ድርጊት፤ የዚህ ፅሑፍ ዋና መልዕክት ነዉ “ ጠላትህን ዉደድ ” የህይወታችንም ትልቁ ፈተና ፣ ሰዉ የመሆናችን እና የእምነታችን መለኪያዉ ነዉ፡፡

ይህ መልዕክት ትልቅነቱ ∕ ጥቅሙ ⁄ ለምን አስፈለገ?

ይልቁንም ሃይማኖተኛ ለሆነዉም ላልሆነዉም ለምን መልዕክቱ መተላለፍ አስፈለገዉ?

( የዚህ ፅሑፍ ዋና ዓላማ የእምነት ትምህርት ማስተማር ላይ ያዘነበለ አይደልም፤ ምንም እንኳን የሃይማኖት ትምህርት ማስተማር ችግር ባይኖረዉም እና ይልቁንም ክብር ያለዉ እና ዋጋዉም እጅግ እጥፍ ድርብ ክፍያዉም በሰማይ የሆነ ቢሆንም  ) ዋናዉ መነሻዬ በመላዉ ዓለም እና በሁሉም የሰዉ ዘር መካከል የጠፋ ትልቅ ቁምነገር (ሀብት) ከመሆኑ የተነሳ እንጂ፡፡“ ጠላትህን መዉደድ ” እምነት ቢኖርህም ባይኖርህም ችግር የሌለዉና ልታደርገዉ የሚገባ ቁልፍ ጉዳይ ነዉ፡፡ ( ነገር ግን በዓለም ላይ ትልቁ ችግር ፣ ዓለምም ያጣችዉ እና የጎደላት ጉዳይ ቢኖር ጠላትን መዉደድ ነዉ፡፡)

"እንድትዋረድስ የምትታሰርበት ምን እንደሆነ እባክህ ንገረኝ"

ይህንን ሀይለ ቃል ለሶምሶን የተናገረችዉ ደሊላ የምትባል በሶሬቅ ሸለቆ የምትገኝ ሴት ናት፡፡ ደሊላ ይህንን ቃል የተናገረችበት ምክንያት ፍልስጥኤማዉያንን በጣም ስላስቸገራቸዉ ከነርሱ መካከልም ብዙ ሰዉ ስለገደለባቸዉ፣ የፍልስጥኤም ነገሥታት እና መኳንንት ደሊላን እያንዳንዳችን 1100 ብር እንሰጥሻለን በምን እንደሚደክም ጠይቂዉ አሏት፤ እርሷም እንዲወዳት ካደረገች በኋላ ወደርሷ አስጠግታ እያሻሸችዉ ይህን ጥያቄ አቀረበችለት፡፡ እርሱም መግለፅ ስላልፈለገ ባይሳካለትም ሦስት ጊዜ እንዲህ እያለ ዋሻት፡-

      I.        1.በሰባት ባልደረቀ በእርጥብ ጠፈር ቢያስሩኝ እደክማለሁ እንደሌላዉም ሰዉ እሆናለሁ፣

     II.       2. ሥራ ባልተሰራበት በአዲስ ገመድ ቢያስሩኝ እድክማለሁ፤

   III.        3.የራሴን ጠጉር ሰባቱን ጉንጉን ከድር ጋር ብትጎነጉኚዉ በችካልም ብትቸክይዉ እደክማለሁ እንደሌላዉም ሰዉ እሆናለሁ አላት፡፡

እነዚህን ጠቅሶ ከዋሻት በኋላ እርሷም እወድሻለሁ ብለኸኝ ለካስ  አትወደኝም፤ የምትወደኝ ቢሆን ኖሮ እንድዋረድ የምትታሰርበትን ምን እንደሆነ በነገርከኝ ነበር አለችዉ፡፡

ፍቅር!

ፍቅር

ስለፍቅር እናዉራ ካልን እጅግ ተቀድመናል፣ ብዙዎች ባማረ ስንኝ በተዋበ ዜማ አወድሰዉታል አብጠልጥለዉታልም፤ የልብ ብሔራዊ ዜማ እስኪሆን እያነባንና እየደማን የልብን ሰንደቅ እየሰቀልን እና እያወረድን እያከበርንና እየተዋረድን ብዙ አዚመናል፡፡ እንደያቅማችን እኛም ቢሆን በጊዜዉ ስንኝ ቋጥረናል፤ እንዲህ እያልን

                                    ኤድያ! ፍቅር

አበድን ….

        ከነፍን ….

 አለኝ

        አልበላ

አላት

       አልጠጣ

አቅበጠበጠን

      አንዘፈዘፈን

ግሞ ተጋግሞ

 … ተቀጣጥሎ መተንፈሻ

አሳጥቶን

አሳጣን

   ዓይን ገባን

ከዓይን ያዉጣችሁ

    ያዝልቃችሁ

       አሉን

" አሜን" ሳንል

ከአንደበታቸዉ ሳይጨርሱት

            መርቀዉን

            እንደተገናኘን

አፍታም ሳንቆይ ወዲያዉ ተለያየን፡፡

(ደረሰ ረታ)

ቋጠሮ ቋጥረን እምባችንን አብሰን መሃላችንን አፍርሰን ዳግም እንደገና ለፍቅር ስንል በፍቅር ጦር ሜዳ እንሰለፋለን ሌላ ምንም አይደለም በቃ ፍቅር ስለሆነ ብቻ!

ደግሞ ትንሽ እንቆይና

ሌላ የስንኝ ቋጠሮ ይገመዳል፤

……

እንሰነባብትና ምሬታችንን መለኪያ ቋጠሮ …. በየጎዳናዉ እንቀባጥራለን፤

" ይህቺ ሴት "

ያቺም ኋሜተኛ ይቺም ስሞተኛ

ላላማት ላታማኝ

ከማን ተነጥዬ

ከየትኛዋ ልተኛ?

እኔንስ ጨነቀኝ እኔንስ ጠበበኝ

ከጎኔ የሳባት አጥንት እየወጋችኝ

ሥሄድ ተከትላኝ ስመጣ እየገፋችኝ

መቆሚያ መቀመጫ

መሞቻ አሳጣችኝ፡፡

እስኪ ስለፍቅር እንቀኝለት ቅኔ!

(ደረሰ ረታ)

ያለፍቅር እንደማይሆን ስናዉቀዉ በተደበላለቀ ስሜት ለእርግማንና ለፀፀት እንዲህ ስንኛችንን እንቋጥራለን

መከራዬ ትንገስ

ችግሬም ትወደስ

እስከ ዘለዓለም ትሁን የኔ ቅርስ

በድዬ ከሆነ ፍቅሬን ገፍቼ

አርክሼም ከሆነ ክብሩን ረስቼ

…. … አልያ ግን  …. አልያ ግን

በዳዮቼን ሁሉ ገፊዎቼን ሁሉ

ይገፉ አልልም!

ይከፉም አልልም!

… … ግን … …

ይማሩ … ተበዳይን ይካሱ፣

ፍቅርን ከል ጥቀርሻ ስላለበሱ

… … ፍቅር ሆይ …

መስክሪኝ! ፍረጂኝ!

ይህን ክፉ በደል

ክፈይኝ ወረታዉን

የፍቅር ምላሹን፡፡

(ደረሰ ረታ)

ደግሞ ስናገኝ ጮቤ እንረግጣለን፤ ስንጎዳ እናለቅሳለን፡፡ ነገር ግን ሁላችንም ልብ የማንለዉ ነገር መበደላችንን፡፡

እናቅርብ ዉዳሴ ሲያሰኘን ወቀሳ

ለትንታኔዉ በካህሊል ጊብራን ድርሰት እንዲህ እያልን እንነሳ

ፍቅር!

መንገዶቹ አስቸጋሪ አቀበት ቢሆኑም ፍቅር ሲጠቅሳችሁ ተከተሉት፡፡ በላባዎች መካከል የተደበቀዉ ሰይፍ ሲያቆስላችሁ ክንፎቹም ሲያቅፋችሁ ተሰጡት፡፡

የሰሜኑ የነፋስ የአትክልት ስፍራን እንደሚያወድም፣

ድምፁ ህልሞቻችሁን ቢበትንም፣

ሲያናግራችሁ እመኑት፡፡ ፍቅር እንደሚያነግሳችሁ ሁሉ ይሰቅላችኋልና፡፡ለዕድገታችሁ እንደሆነዉም ሁሉ ለምልመላችሁ ነዉና፡፡

ወደ ጫፋችሁ ወጥቶ በፀሐይ ዉስጥ የሚያርገደግዱትን እጅግ ለስላሶች ቅርንጫፎቻችሁን በፍቅር እንደሚዳብሰዉ ሁሉ፣ እንዲሁም ወደ ሥሮቻችሁ ወርዶ በመሬት ዉስጥ በይዞታችሁ ይነቀንቃችኋል፡፡

እንደ ስንዴ ነዶ ወደ ራሱ ይሰበስባችኋል፡፡

እርቃን ሊያደርጋችሁ ይወቃችኋል፡፡

በገለባዎቻችሁ እንድትለዩ ያነፍሳችኋል፡፡

ለንጣት ይፈጫችኋል፡፡

እስክትለስልሱ ያቦካችኋል፡፡

ለእግዚአብሔር ቅዱስ ግብዣም ቅዱስ እንጀራ እንድትሆኑ ከዚህ በኋላ ለቅዱስ እሳቱ ይዳርጋችኋል፤

የልባችሁን ምሥጢሮች እንድታዉቁና በዚህ ዕዉቀት የልብ ሕይወት መአዛ እንድትሆኑ ፍቅር እነዚህን ነገሮች ሁሉ ያደርግባችኋል፡፡

ነገር ግን ከፍርሃታችሁ የተነሳ የፍቅርን ደስታ ብቻ ብትፈልጉ እርቃናችሁን ሸፍናችሁ ከፍቅር አዉድማ ገለል ብትሉ ይሻላችኋል፡፡ … ፍቅር ራሱን እንጂ ምንም አይሰጥም፡፡ ከራሱም በቀር ምንም አይቀበልም፡፡

ፍቅር ማንንም ገንዘቡ አያደርግም፡፡ለማንም ገንዘብ አይሆንም፤ፍቅር ለራሱ በቂ ነዉና፡፡

ስታፈቅር " እግዚአብሔር በልቤ ዉስጥ ነዉ " አትበል፤ ይልቁን ግን " እኔ በእግዚአብሔር  ልብ ዉስጥ ነኝ " በል እንጂ፡፡

የበቃህ ሆነህ ካገኘህ ፍቅር ጎዳናህን ይመራልና የፍቅርን ጎዳና መምራት የምትችል አይምሰልህ፡፡ ራሱን ከመሙላት በቀር ለፍቅር ሌላ ምኞት የለዉም፡፡

ነገር ግን ካፈቀራችሁና ምኞቶች እንዲኖራችሁ ከፈለጋችሁ ምኞቶቻችሁ እነዚህ ይሁኑ፤

ቀልጦ ቃናዉን ለሌሊት እንደሚያዜም ጅረት መሆን፤ 

የርህራኄን ብዛት ህመም ማወቅ (መቅመስ)፤

 በጋዛ ራሳችሁ የፍቅር ማስተዋል መቁሰል በፈቃደኝነትና በደስታም መድማት፤

ክንፍ ባለዉ ልብ በጎህ ተነስቶ ስለሌላዉ የፍቅር ቀን ምስጋና ማቅረብ ፡፡

በቀትር ሰዓት አርፎ የፍቅርን በረከት ማሰላሰል፤

ማታም በምስጋና ወደ ቤት መመለስ፡፡

ከዚያ በኋላ በልባችሁ ዉስጥ ለተወዳጆቻችሁ ፀሎት በከንፈሮቻችሁ ላይ በዉዳሴ ዜማ መተኛት፡፡   

ፍቅር ወደድንም ጠላንም እዉነቱ ይህ ነዉ፤ 

እዉነትም የፍቅር ትርጉሙ ያልገባን ገብቶንም እንዲህ መኖር ያልፈለግን ከፍቅር አዉድማ ገለል እንበል፡፡ ቅዱሱን ስፍራ በረከሰ ማንነታችን አናርክሰዉ፡፡ ወልደ አምላክ የደም ዋጋ የከፈለበት ነዉና፡፡

ዋጋ ሲተመን!

ሰዉየዉ ቤታቸዉን ለመሸጥ ቆርጠዉ ተነስተዋል፤ የመንደሩ ሰዉና ደላላ ከጠዋት የእርሳቸዉን ቤት መሸጥ መነጋገሪያ ከማድረጉ ባሻገር የማሻ ልመንህ ዋጋዉን ጣሪያ ማስነካት ገዢዎችን ከስፍራዉ ዝር እንዳይሉና ቤቱን እንኳን መግዛት ማየት እንዳይችሉ አድርጓቸዋል፡፡ ከዕለታት አንድ ቀን በዕድሜ ጠና ያለ ሰዉ መጥቶ ደጅ ይጠፋል(ያንኳኳል) የቤቱ ጠባቂም ደጁን ይከፍትና ማንን ፈልገዉ እንደሆነ ይጠይቃቸዋል፡፡ የቤት ገዢ መሆናቸዉን እና የቤቱን ባለቤት (ሚስትየዉን ) እንደሚፈልጉ ይነግሩትና ይጠራላቸዋል፡፡

ሁለቱ ሰወች ስለቤቱ ጥሩነት ግቢዉም ሰፊ መሆኑን ነገር ግን ዋጋ እጅግ ዉድ እንደሆነ አዉርተዉ ገዢዉ ሴትዬዋን ለባለቤታቸዉ ዋጋዉን እንዲቀንሱላቸዉ አደራ ጭምር ነግረዉ ይሄዳሉ፤ ሚስትም ቀን እንደተባሉት አባወራ ወደቤት ሲገቡ የእግር ዉሃ  አቅርበዉ እግር እያጠቡ (ጊዜዉ እንደዛሬ የሴቶች እኩልነት ባልነበረበት ሰዓት /ፍቅር እንዲህ ዝቅ ብለዉ የሚገልፁበት ወቅት/ ወንዶች የበላይ ነን ብለዉ የሚመኩበት ዘመን/ ነበር) ቀና ይሉና ባሻዬ ዛሬኮ አንድ ሰዉ መጥቶ ቤቱን እንደሚሸጥ ጠየቀኝ እኔም እንደሚሸጥና እርሶ የሚሉትን ዋጋ ነገርኳቸዉ፤

ምን ማለት ነዉ " አንተ የምትለዉን "ማለት አንቺስ የቤቱ ባለድርሻ አይደለሁም ነዉ ወይስ ነገሩ እንዴት ነዉ?

"ማለቴ" እያሉ ቀጠሉ ሴትዮዋ ፈራ ተባ እያሉ " ሰዉየዉ እንዳሉት ዋጋዉ ትንሽ ወደድ ብሏል ለማለት ፈልጌ ነዉ"

አንቺ ሴትዮ በጤናሽም አይደለሽ? አንዴ አንተ እንዳልከዉ፣ አንዴ ደግሞ ሰዉየዉ እንዳለዉ የሚያሰኝሽ ምንድን ነዉ? ገዢ ነሽ ሻጭ?

እህ እንደዛ አላልኩም እርሶም ያሉት ዋጋ እንኳን ለገዢነት ለሻጭም ጥሩ አይደለም ይወደዳል እዚህም እንደሆነ ይህን ያህል ዋጋ ያወጣ ቤት ስላላየሁ ነዉ እንደዛ ማለቴ ሰዉየዉም ሲያዩዋቸዉ ገዢ ይመስላሉ ስለዚህ የሚሉትን ቁርጥ ያለ ዋጋ ይንገሩዋቸዉና እንሽጥ ለማለት ነዉ፡፡

እንግዲህ እኔ ያልኩትን ብያለሁ! የሚገዛ ከመጣ እንሸጣለን አለበለዚያ ቤታችን ከእኛ ጋር እነሱም ገንዘባቸዉ ከራሳቸዉ ጋር ምን ያጋጨናል ገዢ ከጠፋ እኛዉ እንኖርበታለን ምን አስጨነቀን ባዶዉን አይሆን፤

ካሉ ጥሩ! ብለዉ ሴትዮዋ እግር አጥበዉ እንደጨረሱ እራት አቅርበዉ በልተዉ ከጨረሱ በኋላ ወደ መኝታ ሄዱ፡፡

ሌላ ቀን ደግሞ የሁነ ሰዉ እንዲሁ መጣ! ዋጋ ተነጋገሩ ሳይስማሙ ቀሩ ሄደ!

በሌላኛዉም ቀን ብዙ ሰዎች መጡ ሳይስማሙ ቀርተዉ ተመልሰዉ ሄዱ!

አንድ ቀን ግን የመጡት ሰዉ አጥብቀዉ ተከራከሩአቸዉ ገዢም እንደሆኑ አስረግጠዉ ነገሩአቸዉ፤ ባለቤትየዉም እንድዲህ ቤቱን ከወደዱት ገንዘብ መያዝ ሳይሆን ወጣ አድርጎ መግዛት ነዉ እያሉ ከረር ብለዉ ተናገሩ፡፡ ሰዉየዉ እንዲቀንሱላቸዉና ቀብድም ሰጥተዉ ሊሄዱ እንደሚፈልጉ ቢነግሯቸዉ ሻጭ አሻፈረኝ አሉ፡፡

ከገዢ ጋር የመጡት ሰዉ ሁለቱን ለማስማማት የተወሰነ ሙከራ አደረጉ ግን ሰሚ አላገኙም፤ ሻጭ ይልቅስ የምተገዙ ከሆነ በደንምብ ዙሪያዉን እዩት፣ የግቢዉንም ስፋት ተመልከቱት፣ ካርታዉም በጄ ነዉ፣ ደግሞ በዚህ ላይ እዚህ ግቢ ዉስጥ ያለ አትክልት አመቱን ሙሉ ገበያ አያስመኛችሁም ከጊቢዉ ዞርዞር ብላችሁ ብትመለከቱ የምታጡት ነገር የለም፡፡ይልቅስ ንትርኩን ትተን ተስማምተን እናንተም ቤታችሁን ዉሰዱ እኔም የሚደርሰኝን ነገር ስጡኝና ወደሚሄድበት ልሂድ በማለት ነገሩን ቋጩት፡፡

ገዢ የሚለዉ ቢጠፋዉ "ለመሆኑ ዋጋዉ እንዲህ ጣሪያ የነካዉ ይሄ ቤቴ (ሊገዛዉ እንደሆነ ሲወስን ነዉ ቤቴ ማለት የጀመረዉ) የተለየ ከሌላዉ ምን የተለየ ቢኖረዉ ነዉ?" ብሎ ጠየቀ፤

ምን ቀረዉ ሰፊ መሬት አለህ፣ ይህን የሚያክል ትልቅ በዚህ ግቢ ላይ የተንጣለለ ቤት አለዉ፣ የአትክልቶቹን ነገር አታንሳዉ ይህ ሁሉ ተደምሮ ብለዉ ድምር ዋጋዉን ነገሩት፤

"የተቀረዉስ ገንዘብ?" ገዢ ጠየቀ

የተቀረዉማ ሰፈሩን እንደምትመለከተዉ ጥሩ መኖሪያ ነዉ፣ አየሩንም ልብ ብለህ ካየኸዉ ጤና ነዉ! እነዚህም የየራሳቸዉ ዋጋ አላቸዉ ብለዉ ዋጋቸዉን ነገሩት፤ አሁንም ሂሳቡን ቢያሰላዉ ዋጋዉ እኩል አልመጣም " የቀረዉስ?" አላቸዉ

"የቀረዉ ደግሞ በሶስቱም ማዕዘን ያሉ ጎረቤቶችህ ዋጋቸዉ ከቤቱ በላይ ነዉ ሰወች እንዳይመስሉህ  አብረሃቸዉ መኖር ስትጀምር እንዲያዉም ከመላዕክት ጋር የተጎራበትክ ነዉ የሚመስልህ እነሱም በዚህ ቤት ዋጋ መጨመር ላይ ትልቅ ድርሻ አላቸዉ፡፡እንዲያዉም እንዳልጎዳህ ብዬ ነዉ እንጂ ያንሳቸዋል! ያንሳቸዋል፤ የጎረቤቶችህ ዋጋቸዉ የሶስቱንም ደምሬ በቤቱ ላይ 200 መቶ ሺ ብር ጨምሬበታለሁ ጠቅላላዉን ስትመታዉ (ሰትረደምረዉ) ልክ አይመጣም?"

ይመጣል!

"እና ያተረፍኩብህ ነገር አለ?"

የለም!

"በል እንግዲህ የምትገዛ ከሆነ ይኸዉልህ ቤቱ ፡የማትገዛ ከሆነ ደግሞ…."

አላስጨረሳቸዉም ለቀብድ የሚሆን በእጁ የያዘዉን ጥሬ ገንዘብ ሰጥቶ ነገ ተመልሶ አጠናቆ እንደሚከፍል ተናግሮ እየተገረመና እየተደመመ ከስፍራዉ ጠፋ፡፡

ሁላችንም የምንፈልገዉ እና የጎደለብን እንዲህ አይነት ቤት እና ሰፈር ነዉ፤ የገዛናቸዉና የሸጥናቸዉ ቤቶች የህን አሟልተዉ ይሆን?

ምንደሮቻችንስ ዝም ብለን በዘልማድ ስንኖርባቸዉ ስለኖርን ነዉ ወይንስ እዉነት መኖሪያ ሰፈር ናቸዉ? ልጆች አድገዉ ለቁምነገር የሚበቁበት ናቸዉ?ጎረቤቶቻችንስ፣ እኛስ ብንሆን ለጎረቤትነት ብቁ ነን? ለኛ ዋጋ ቢወጣልን ዋጋ እናወጣለን ይሆን ወይስ ኪሳራ?

ሴት ሐዋርያ

ቤተክርስትያን በክርስቶስ ኢየሱስ ደም የተመሰረተች መሰረቶቿ ከዐለት እጅግ የጠነከሩ፡ ሐዋርያት ከዳር ዳር ተዘዋዉረዉ ወንጌልን በማስተማር ያፀኗት፡ ሰማዕታት ደማቸዉን አፍሰዉ አጥንታቸዉን ከስክሰዉ ያቆዩዋት፡ ደናግላን÷ መናኞች÷ባህታዉያን በገዳም ጤዛ ልሰዉ ድንጋይ ተንተርሰዉ ድምፀ አራዊቱን ፀበ አጋንንቱን ታግሰዉ በፆምና በጸሎት ያቆዩዋት  ቅድስት ቤተክርስቲያን የእግዚአብሔር ደጅ ነች፡፡ ከነዚህ ቤተክርስትያንን ለዛሬ ካደረሱት መካከል ሴቶች ከፊሉን ድርሻ ይወስዳሉ፡፡ ሴቶች (እናት፡ ሚስት፡ እህት፡ … ከመሆን ባሻገር ይልቁንም በአገራችን በኢትዮጵያ ትልቅ ተሳትፎ በሁሉም ስፍራ ሲያበረክቱ ይታያሉ፡፡ ከምንም በላይ ደግሞ የገጠሯ ሴት በብዙ ቦታ ጉልህ ድርሻ አላት፡ ልጅ ወልዳ አሳድጋ እድሜዉ ለአቅመ ትምህርት ሲደርስ እርሷ ሳትማር ልጇን ለትምህርት ያላትን ቋጥራ ከየኔታ ጋር ሰዳ ፊደል ቆጥሮ፡ መዝሙረ ዳዊት ደግሞ፡ ቅዳሴ ተምሮ፡ ቅኔ ተቀኝቶ፡ … ቤተክርስትያንን እንዲያገለግል ወይም እርሱም መፅሓፍ ዘርግቶ እንዲያስተምርና ተተኪ እንዲያፈራ የምታደርግ የቤተክርስትያን ባለዉለታ እና መከታ የሆነች ሴት ናት፤ ከዚህም ባሻገር የበረቱት እንደ እማሆይ ጀማነሽ ያሉቱ መፅሃፍ ዘርግተዉ ደቀመዛሙርት ሰብስበዉ አስተምረዉ የሚያስመረቁ ሴቶች አልታጡም ይህ ሰማአዕትነት፡ ሐዋርያነት ነዉ፡፡ በመፅሐፍ ቅዱስም ብዙ መልካም ስራን የሰሩ ለቤተክርስትያን ማገር ዋልታ የሆኑ ብዙ ተጠቃሽ ሴቶች አሉ፡ የሐዋርያትን ፍኖት ተከትለዉ ከጌታ እግር  ስር የተማሩ 36ቱ ቅዱሳን እንስት ሌላ ተጠቃሽ ሴቶች ናቸዉ፡፡

     ዛሬም ቤተክርስቲያን ልጆቿን የእግዚአብሔር መንግሥት የምታስወርስ የሴት ሐዋርያ ትፈልጋለች /ያስፈልጋታል/፡፡

ሴት፡- ስንል ሌላ ተዓምር ማለታችን አይደለም እግዚአብሔር በመልኩና በአርአያው በመጀመሪያ ከወንድ የፈጠራት ፍጥረት ማለት ነው፡፡ ሴት /ሔዋን/ የህያዋን ሁሉ እናት ከአባታችን ከአዳም የግራ ጎን በተፈጠረች ጊዜ የቤተክርስቲያን መጽሐፍት /ታሪክ/ እንደሚነግረን ስላሴ የሰውን ልጅ እንፍጠር ብለው በተመካከሩ ሰዓት አብና መንፈስ ቅዱስ አዳም ደካማ ባህርይ /የሚሳሳት/ ስለሆነ አንፈጥርም ሲሉ ወልድ እዋሰዋለሁ ብሎ ሊፈጠር ችሏል፤ ለዚህ ድካሙ ረዳት አጋዥ ትሆነው ዘንድ የተፈጠረችለት የመዳን የብርታት የጥንካሬ ሐዋርያ ሌላ ወንድ አልነበረም ሴት /ሔዋን/ እንጂ፤

          ዛሬም ደካማውን መሳት ያለበትን አዳም ልትጥለው ልትገረስሰው ምክንያተ ስህተት የምትሆንበት ሳይሆን